Flug til Varsjár á lægsta verði með PLAY frá 12.054 kr. *

Ódýrt flug til Varsjár

Næturljóð og grænir garðar

Varsjá er höfuðborg Póllands og virkilega einstakur áfangastaður. Hér mætast áföll og átakanleg saga 20. aldarinnar annars vegar og ótrúleg uppbygging og baráttuvilji hins vegar. Fáar borgir fóru jafnilla út úr seinni heimsstyrjöldinni og Varsjá (í raun engin) en elsti hluti borgarinnar sem var nánast jafnaður til jörðu hefur verið listilega vel endurgerður og er í dag á heimsminjaskrá UNESCO. Hér ætti fyrsti viðkomustaður að vera Uppreisnarsafnið þar sem sögunni eru gerð ýtarleg skil sem dýpka til muna allan skilning á borginni. Varsjá nær að sameina gamla sögu sína og nýja framúrstefnulega menningu með söfnum, viðburðum og æðislegu borgarumhverfi. Hér má auðveldlega verja deginum í að skoða síðasta píanó Chopin og kvöldinu í að kanna einhverja bestu teknóklúbba í heimi. Lærðu allt um Marie Curie á safni tileinkuðu henni og skoðaðu svo litríka veggjalistina á meðan þú röltir um hipsterahverfið Praga. Varsjá er alvörustórborg og sjötta stærsta borg Evrópusambandsins en nærri fjórðungur hennar flokkast samt undir græn svæði. Ber þar helst að nefna gullfallegan Lazienki-garð með hallir sínar, tjarnir og páfugla en hér er varla þverfótað fyrir görðum og grænum svæðum. Borgin er eins og fullkomin blanda af lifandi heimsborg og fallegri náttúru.

Vellystingar í Varsjá

Verðlagið hér er afar hagstætt og því er tilvalið að leyfa sér mun meira en ella og velja vellystingar í nokkra daga í Varsjá. Fimm stjörnu hótel eru mun ódýrari í Varsjá en flestum öðrum borgum Evrópu og hægt að finna íburð og lúxus á vel viðráðanlegu verði. Fyrir þá sem eru mættir til að versla mælum við sérstaklega með gamla markaðstorginu, Rynek Starego Miasta, og svæðinu þar í kring en þar er hægt að gera kjarakaup í gullfallegu sögulegu umhverfi borgarinnar. Ekki missa af hinni stórfenglegu Menningar- og vísindahöll sem Stalín gaf borginni um miðja síðustu öld en þrátt fyrir umdeildan uppruna hennar er byggingin glæsileg og útsýnið af efstu hæðunum óviðjafnanlegt. Og talandi um útsýni, við mælum að sjálfsögðu með leiðsögn um borgina fyrir ferðamenn og ekki síst siglingum um ána Visla en þeir sem vilja halda leiðöngrum í ódýrari kantinum er bent á sporvagnakerfi borgarinnar sem rúllar í rólegheitunum á milli helstu ferðamannastaða og er auk þess hið mesta stemningsferðalag. Borgaðu minna fyrir flugið og fararmátana og leyfðu þér raunverulegan munað í þessari spennandi menningarborg og höfuðborg Póllands.