Skoða efni

Góð sætanýting og 92 þúsund farþegar í september

PLAY flutti 92.181 farþega í september en það eru færri farþegar en í ágúst þegar PLAY flutti 109,956 farþega. Sætanýting í september var 81,5% miðað við 86,9% í ágúst og 87,9% í júlí. Sögulega er september nokkuð krefjandi mánuður í fluggeiranum. Minni eftirspurn er eftir fjölskyldu- og skemmtiferðum enda skólarnir byrjaðir og fólk komið aftur í vinnu eftir sumarfrí. Markaðurinn verður því háðari viðskiptaferðum. Á sama tíma hefur tengiflugsleiðakerfið mjög góð áhrif á reksturinn, þar á meðal á nýtingu flotans og á lækkandi einingakostnað.  Stundvísi var 86% í september.

Fleiri áfangastaðir í Portúgal

Jómfrúarflug PLAY til Liverpool John Lennon flugvallar var í morgun. PLAY mun fljúga til Liverpool tvisvar í viku, á mánudögum og föstudögum. Nú geta farþegar PLAY því flogið á milli Liverpool og Íslands og fjögurra áfangastaða PLAY í Bandaríkjunum.

Þá hóf PLAY miðastöðu til Porto í Portúgal í gær. Áætlunarflug hefst í apríl 2023 og flogið verður tvisvar í viku. Þetta er í fyrsta sinn sem flugfélag býður beint flug á milli Íslands og Porto. Porto er annar áfangastaður PLAY í Portúgal en í ár hefur PLAY flogið til höfuðborgarinnar Lissabon tvisvar í viku og verður því framhaldið á næsta ári.

Meira en þrjú þúsund sóttu um starf hjá PLAY

Í byrjun september auglýsti PLAY eftir 150 flugliðum og 55 flugmönnum en um er að ræða stærstu ráðningu félagsins í einu vetfangi. Ráðningarnar eru í tækt við enn frekari umsvif PLAY sem mun taka fjórar nýjar flugvélar í notkun næsta vor. Viðtökurnar létu ekki á sér standa og yfir þrjú þúsund manns sóttu um auglýstar stöður.

„Við erum nokkuð ánægð með sætanýtinguna fyrir septembermánuð enda mánuður sem alla jafna er krefjandi í fluggeiranum. Þá eru vetrarmánuðirnir sem fram undan eru jafnframt venjulega krefjandi fyrir flugfélög en salan hjá okkur hefur hins vegar verið sterk síðustu vikur eftir rólegt tímabil síðsumars. Við höldum því áfram á okkar vegferð; bætum við áfangastöðum, flugvélum og starfsfólki fyrir næsta sumar. Styrkur tengiflugsleiðakerfisins býr til sveigjanleika til að bregðast við þegar eftirspurn sveiflast á milli markaða. Það er einmitt vegna sveigjanleikans sem við förum örugg inn í veturinn. Daglegur rekstur stendur áfram styrkum fæti, við erum stolt af stundvísi félagsins og viðskiptavinir okkar eru alla jafna mjög ánægðir með þjónustu PLAY. Þessi atriði gera mig stoltan af starfsfólki PLAY á hverjum degi og gera það að verkum að ég horfi bjartsýnn til framtíðar,“ segir Birgir Jónsson, forstjóri PLAY.