62 þúsund farþegar, 77% sætanýting og sölumet slegið í janúar
PLAY flutti 61.798 farþega í janúar sem er fimmfalt á við farþegafjölda á sama tíma á síðasta ári. Sætanýting var 76,8%. Þessar tölur eru mjög ásættanlegar fyrir janúarmánuð í fluggeiranum og ótvíræður vitnisburður um skilvirkt leiðakerfi og góðan árangur í sölu- og markaðsmálum.
Flugferðir til Tenerife nutu sérstaklega mikilla vinsælda í mánuðinum með meira en 90% sætanýtingu. Sætanýting til Parísar var svipað góð.
31% af farþegum PLAY í janúar ferðuðust frá Íslandi, 37% til Íslands og 32% voru tengifarþegar.
Bókunarstaða í janúar var feiknasterk og sölumet var slegið í mánuðinum.
Stundvísi PLAY í janúar var 84,3% sem er mjög góður árangur í ljósi krefjandi veðuraðstæðna á Íslandi í mánuðinum.
Frábærar viðtökur í Kanada
PLAY hóf miðasölu á flugsætum til Toronto í Kanada þann 10. janúar síðastliðinn. Viðtökurnar fóru verulega fram úr væntingum og miðasalan fór sérstaklega vel af stað. Óhætt að segja að þessi viðbót við leiðakerfið hafi verið rökrétt næsta skref. Áætlunarflug til Toronto hefst þann 22. júní en flogið verður alla daga vikunnar á Hamilton International flugvöll. Þetta er fimmti áfangastaður PLAY í Norður-Ameríku. Boðið verður upp á frábærar tengingar við 15 áfangastaði PLAY í Evrópu.
„Farþegatölurnar í janúar voru góðar og nýtingin vel ásættanleg þrátt fyrir að eftirspurn sé almennt með lægsta móti í janúar. Við nýttum sveigjanleika leiðakerfisins og aðlöguðum tíðni flugleggja til að lágmarka kostnað á þessum lágannatíma í flugrekstri. Bókunarstaðan í janúar var feiknasterk sem er til marks um gott ár fram undan. Við verðum með næstum því 77% meira framboð í sumar miðað við síðasta sumar og fáum fjórar nýjar flugvélar. Þá bjóðum við 200 nýja starfsmenn velkomna um borð en það er sannur heiður að fá að fylgjast með PLAY teyminu stækka og styrkjast,“ segir Birgir Jónsson, forstjóri.
Operational Statistics January 2023Hlekkur opnast í nýjum flipa
