Sterk bókunarstaða samhliða áherslu á sólarlandaáfangastaði

Flugfélagið Play flutti 117.199 farþega í liðnum maí, borið saman við 146.692 farþega í maí 2024, sem endurspeglar 14.0% mun á framboði milli ára sem er bein afleiðing af ákvörðun PLAY að leigja farþegaþotur til SkyUp í gegnum maltneska flugrekstrarleyfið og að leggja meiri áherslu á bein flug frá Íslandi.

Sætanýtingin í maí var 80.9%, borið saman við 86.4% í maí 2024, sem er aftur afleiðing af ákvörðun PLAY að auka framboð til sólarlandaáfangastaða í Suður-Evrópu. Sólarlandaáfangastaðir gefa af sér betri afkomu en þar sem um er að ræða beint flug frá Íslandi þar sem tengifarþegar eru ekki fyrir hendi, kemur það jafnan niður á sætanýtingu.

Af þeim farþegum sem flugu með PLAY í maí voru 39.0% á leið frá Íslandi, 29.3% á leið til Íslands og 31.7% voru tengifarþegar (VIA).

Stundvísi PLAY í maí var 92.3%, borið saman við 86.8% í maí 2024.

Horfur fyrir sumarið 2025 eru jákvæðar þar sem sjá má framfarir á bæði sætanýtingu og einingatekjum, borið saman við sama tímabil í fyrra. Það gefur til kynna að áhersla PLAY á að auka framboð til sólarlanda er að skila árangri og hefur PLAY sýnt í verki þær yfirlýsingar sínar um að leggja áherslu á slíka áfangastaði þar sem framboðið jókst um 26% á milli ára í maí.

PLAY mun fljúga vikulega á föstudögum til Agadír í Marokkó frá 19. desember fram í miðjan apríl 2026. Agadír er nýjast sólarlandaáfangastaður PLAY en flugið þangað er um fimm hálf klukkustund. Loftslagið í Agadir er svipað og á Tenerife en borgin nýtur sólskins um 300 daga á ári. Borgin er þekkt fyrir gylltar strendur, golfvelli á heimsmælikvarða og vinalegt viðmót. PLAY mun einnig fljúga tvisvar í viku til Marrakesh í Marokkó frá október til apríl 2026.

PLAY verður því með 16 sólarlandaáfangastaði í leiðkerfinu sínu í ár, þar á meðal átta á Spáni, fjóra í Portúgal, ásamt Split í Króatíu og Antalýu í Tyrklandi.

Einar Örn Ólafsson, forstjóri PLAY:

„Við erum að fara inn í öflugt sumar þar sem sætanýting og einingatekjur eru yfir síðasta sumri. Það sýnir að ákvörðun okkar um að auka framboð til sólarlanda er að skila þeirri niðurstöðu sem við lögðum upp með að ná.

Við hófum formlega samstarf við SkyUp þegar tvær af farþegaþotum okkar fóru í leiguverkefni fyrir félagið í gegnum maltneska flugrekstrarleyfið nú í maí. Tvær þotur til viðbótar fara í verkefnið í sumar. Þetta verkefni er einn af hornsteinum nýs viðskiptalíkans PLAY sem skapar okkur meiri fyrirsjáanleika í rekstrinum.

Ég er einstaklega stoltur af stundvísinni félagsins í maí. Við náðum 92.3% sem er framúrskarandi árangur og sýnir þann mikla aga og fagmennsku sem býr í samstarfsfólki mínu hjá PLAY. Nú fara í hönd annasömustu mánuðir ársins og eins og áður munum við hjá PLAY leggja allt kapp á að bjóða upp á ódýr flugfargjöld og frábæra þjónustu fyrir farþega okkar.“