Lissabon
Ódýrt flug til Lissabon
Unaðslegt loftslag í einni elstu borg Evrópu
Lissabon, höfuðborg Portúgals, er ein elsta borg heims sem ætti ekki að koma á óvart í ljósi þess að staðsetning borgarinnar er óneitanlega öfundsverð og loftslagið unaðslegt. En þótt rætur borgarinnar teygi sig mörg þúsund ár aftur í tímann, er Lissabon í dag ung í anda með sínum litríku götumyndum og lifandi andrúmslofti.
Saga Lissabon er bæði stórfengleg og dramatísk. Þessi gamla hafnarborg leiddi landvinninga um heimshöfin árhundruðum saman. Á 16. öld lögðu landkönnuðir af stað frá Belém turni, formlegu borgarhliði Lissabon við höfnina. Turninn stendur enn þann dag í dag og hægt er að ganga frá honum með fram ströndinni að risastórum minnisvarða um landvinningana. Í klaustri heilags Híerónýmusar (Mosteiro dos Jerónimos) er svo að finna sjóminjasafn borgarinnar en bæði byggingin og safnkosturinn eru stórkostleg upplifun.
Staðsetning Lissabon og nýjar siglingarleiðir gerðu borgina mjög ríka á sínum tíma en þessir kostir hennar gerðu hana líka að vinsælu skotmarki innrásarherja. Enn gætir erlendra áhrifa úr öðrum menningarheimum sem gera borgina ævintýralega og litríka og virðist viðhalda þessum botnlausa brunni sköpunar sem Lissabon sækir enn í.
Gylltar strendur og lifandi listasena
Lifandi listasenan endurspeglast í fjölda ungra listamanna sem flykkjast til borgarinnar og í framsækinni matargerðinni þar sem allt er í boði, svo lengi sem það bragðast vel. Gylltar strendur borgarinnar ramma inn bæði Atlantshafið og þessa unaðslegu upplifun fyrir öll skynfærin. En ekkert segir Lissabon eins og heimsfræg keramiklistin. Portúgalskar Azulejo-flísarnar eru heimsfrægar fyrir litadýrðina og frásagnarhefðina. Öll borgin er í raun undirlögð af þessum fallegu skreytingum en fyrir þá sem vilja meiri innsýn er Azulejo-safnið tilvalinn áfangastaður. Fronteira-höllin er síðan eitthvert stórbrotnasta dæmi um þetta listform og ómissandi viðkomustaður allra sem heimsækja Portúgal.
Enginn einstakur viðburður hefur farið jafnilla með Lissabon og jarðskjálftinn mikli ásamt flóðbylgjunni og eldsvoðunum sem hann olli árið 1755 en í valnum lá 85% borgarinnar og um 50.000 manns. Af þeim fáu götum sem sluppu má finna flestar í elsta hluta Lissabon, Alfama, ævintýralega litríku hverfi með þröngum götum og vinalegu götulífi. Saga jarðskjálftans er kapítuli út af fyrir sig sem eru gerð góð skil í sögusafni Lissabon (Lisboa Story Centre).
Í útjaðri stórborgarsvæðis Lissabon er svo að finna bæinn Sintra. Bærinn var í sérstöku uppáhaldi hjá okkar allra besta Hans Christian Andersen sem þótt Sintra fegursti staður í heimi og heimsótti hann oft og reglulega. UNESCO er sama sinnis enda hefur Sintra verið á heimsminjaskrá síðan 1995. Ekki langt frá Sintra er höfðinn Roca, vestasti hluti meginlands Evrópu en þar til á 14. öld var Roca talinn vera útjaðar heimsins.
Heimurinn átti síðar eftir að stækka en vissulega endar Evrópa hér og hún endar með stæl.
Á heimavelli
„Þetta er borg sem þú getur labbað um allan daginn, alltaf rekist á eitthvað nýtt og skemmtilegt og leyft henni að leiða þig áfram,“ segir Logi Pedro í skemmtilegu spjalli þeirra Villa Neto um Lissabon, borgina sem þeir eru sannarlega báðir á heimavelli í. Fáðu góð ferðaráð frá fagmönnum og heyrðu af matarmenningunni, tónlistinni, kaffihúsunum og hvað varð um gamla apann hans Loga.
Vinsæl afþreying í Lissabon
Fullkomin gönguferð fyrir þá sem eru að heimsækja Lissabon í fyrsta sinn en hér er farið um helstu kennileiti miðsvæðis í borginni. Leiðsögnin veitir frábæra innsýn inn í sögu og menningu borgarinnar.
Smakkaðu á því allra besta í portúgalskri vín- og matargerð í litlum hópi með leiðsögn. Gengið er um götur og kíkt inn í bakarí, ostabúðir, og smakkað á úrvalsostum, víni og öðru góðgæti. Leiðsögumaður gefur síðan góð ráð um bestu réttina og bestu staðina
Skoðaðu Lissabon með leiðsögn um götulistina í þessari litríku borg. Þetta er borgarævintýri sem fer yfir litríka samtímalist og öðruvísi menningarheima.
